..fa izay rehetra manana dia homena, ka hanambe izy; fa izay tsy manana kosa, na dia izay ananany aza dia halaina aminy ?. Mat.25.29

Miarahaba antsika tratr’izao alahady mialohan’ny farany taom-piangonana 2011 izao indray. Mariky ny famindrampon’Andriamanitra amintsika rehetra nohon’ny fitiavany antsika.

Ary raha ny teny izay novakiantsika tamin’ity andro anio ity dia milaza koa fa efa mifaram-parana ny fampianarana nataon’i Jesosy ary ny fandalovany tety an-tany. Koa , raha ny filazantsaran’i Matio no jerena dia misy fanontaniana 2 tiana ho jerena,

* Ahoana no fomba ijerena izao teny izao ?

* Fomba ahoana no hiainana azy ?

Ahoana no fomba ijerena izao teny izao?

Mpandinika maro no mahatsapa fa miverina indroa izao teny izao ao amin’ny filazantsara Raha ny filazantsara nosoratan’i Matio. Ny ventin-dresaka dia ny fanjakan’Andriamanitra.:

* 13.12 : fa izay manana no homena, ka hanana be dia be izy, fa izay tsy manana kosa , na izay ananany aza dia hesorina aminy. Jesosy nampianatra tamin’ny fanoharana momba ny fanjakan’ny lanitra. Ny zava-misy dia iresahan’i Jesosy amin’ny fanoharana ireto vahoaka ireto satria natao tsy azvela hahalala ny fanjakan’Andriamanitra toy ireto mpianatra izy ireto. Ny hoe manana dia azo adika koa hoe nahazo avy tamin’Andriamanitra. Fomba iray izay azo amaritana ny mpianatr’i jesosy izany eto.

* 25.29,fa izay rehetra manana dia homena, ka hanambe izy; fa izay tsy manana kosa, na dia izay ananany aza dia halaina aminy. Entina hilazana izay hiseho amin’ny fitsarana izay ho avy raha miverina ity olona lazaina fa handeha any amin’ny tany hafa ka nanolotra ny fananany amin’ireto mpanompony 3. Fanoharana ilazana ny amin’ny fanjakan’Andriamanitra koa izany. Ny talenta moa dia ilazana ny vola tamin’izany fotoana izany.

Manoloana izao fiverenana indroa izao dia misy milaza fa izao teny lazain’i Jesosy tamin’ny mpianany izao dia fomba fiteny tamin’ny fotoana androny. Vola, harena no resahina eto. Olona iray no niantso ny mpanompony, dia nanolotra azy ny fananany samy araky ny fahaizany avy : ny voalohany talenta dimy (5), ny faharoa talenta roa (2) ary ny fahatelo nahazo talenta iray (1).

Betsaka ny fanotaniana mety mipetraka toy ny hoe : ireto talenta izay nomena an’ireto mpanompo dia tsy nolazain’ny tompony akory izay hanaovan’ireto mpanompony azy. Ny tantara no mampiseho amintsika fa hay natao hampiasaina/hapetraka/hampitomboina ireto fananana ireto. Tao ny nampitoimbo izany ary dia nahazo tombony toa an’ireto 2 voalohany ary tao ny nandevona izay nomena azy ka tsy mba nampitombo izany.

Manakaiky ny fotoana handaozan’i Jesosy izao fiainana izao. Ka manome fampianarana momba ny fanjakan’ny lanitra na ny fanjakan’andrimanitra amin’ny alalan’ny fanoharana izy.

* Tao ny momba ireto virjina folo ka ny dimy afaka nanatrika ny fanambadiana ny dimy tsy nanana solika ahazoana niandry ny fahatongavan’ity mpampakatra.

* Izao fanoharana momba ny mpanompo izao izay hita fa mizara roa : ao ny nampitombo ny talenta nomena azy ary tao kosa ny nandevina izany.

Samy nantsoina daholo ireto olona ireto dia ny virjina folo (10) izany ary koa ireto mpanompo telo (3) izay aseho eto. Samy nizara roa izy ireto. Ny tafiditra ka afaka nanatrika ny famparana ary ireto tavela ety ivelany. Ireto mpanompo izay nahazo fankasitrahana tamin’ny mpanompony dia izy roa lahy izay nampitombo izany ary koa ilay nandevina ny talentany.

Koa izao teny izao dia jerentsika amin’izay tokony hiainantsika eo am-piandrasana ny fiveran’i Jesosy.

Ahoana tokoa moa izany no tokony ho fiainantsika

Amin’ny maha fanoharana azy, ny talenta dia azo rasina hoe izay nomen’Andriamanitra anao : mety ho harena izany. Izao talenta izao dia mifono hevitra moba ny fahatokisana ary ny fahamalinana. Aoka isika ho mahatoky hatramin’ny farany izay nomen’ny Tompo antsika. Kanefa koa tokony ho malina isika satria ilay fahavalo na ny devoly dia mamingana koa etsy an-kilany. Raha mijery ny tohiny Mat.25.31 isika dia mahita fa hisaraka tokoa toy ny ondry sy ny osy ny mpianatry ny Tompo amin’ny fahatongavany.

Ny zava-dehibe amin’izao teny azontsika anio izao dia ny ampisehoan’i Matio lava dia lava ny amin’izay tsy tokony hataontsika. Ny tanjona dia ny mba tsy hanarahantsika ny fiaina’ity mpanompo tsy mahatoky ka nandevina ny vola izay nomena azy. Lazainy ny tompony fa mila voa tsiary, mijinja eny amin’izay tsy namafazana ary manangona eny amin’izay tsy nanahafana . Izany raha fintinina ny fahafantaran’ity mpanompony ny Tompony.

Fantatry ny Tompo isika tsirairay avy. Efa nomeny araky ny herintsika/fahaizantsika avy isika. Ataoko io teny hoe nomena araky ny fahaizana io dia tena manome toky antsika satria midika hoe mitovy daholo izay voaraitsika tamin’Andriamanitra. Matoa nahazo isika izay dia io azontsika io no tokony hiainantsika. Tsy hampiononana antsika izany fa koa mba hitiantsika amin’Ilay nanome fa izy no nanome ary izy koa no niantso antsika handray anjara miaraka aminy amin’ny fanitarana ny talentany. Raha adika tsotra dia ny fanitarana ny fanjakan’Andriamanitra. Asan’nyt tsirairay avy izany tahaka izay hita eto. Afaka tsy niantso an’ireto mpanompony ireto ity Tompo ity kanefa kosa te-hampiseho amin’ireto mpanompo ny fitokisany amin”izy ireto.

Miandry antsika hiasa eo amin’ny fanjakany ny Tompo eo am-piandrasana ny fiverenany. Efa betsaka ireo azontsika tamin’ny Tompo izay. Eny fa na dia ny nahatongavantsika eto Frantsa avy tany Madagasikara, na koa tonga eto Dijon avy tany Antalaha ary indrindra ny fahatongavantsika eto am-piangonana niala avy tany an-trano. Ny Tompo dia te-hanome anao kanefa kosa alohan’izany dia aoka isika aloha hampitombo/hampiasa izay efa nomeny antsika.

Anisan’ny fampiaharana izany ny fety izay ataontsika amin’ny asabotsy izao izay entintsika hitoriana ny filazantsara.

Raha tsaroanao fa nanafin-talenta ianao teto amin’ity Tafo ity dia aza misalasala fa miantsoa anao ny Tompo ary te-henome anao talenta vaovao indray.

Ny fahatokisana no hafatra atolotra antsika amin’ity anio ity. Ny hijoroantsika vavolombelon’izany fitiavan’Andrimanitra izany. Amen

D.ANDRIANARIVO, pasteur

Toriteny FPMA DIJON

Alahady 13 novambra 2011