"..Ary ianareo no tsy maintsy nitoriana ny tenin'Andriamanitra aloha", Asa.13.46
aha ny taom-piangonana no lazaina, anio dia alahady faha 4 manaraka ny Paska izany hoe ny nitsanganan’i Jesosy tamin’ny maty. Marihina fa eo anelan’elan’ny Paska ary ny alahady Pentekosta dia misy alahady 7 izay no maha 50 andro azy (7 andro * 7 herinandro = 49 andro). Alahady 7 izay nandrenesantsika ny asan’ny apostoly izay nosoratan’i Lioka, ny Apokalipsy ary ny filazantsara izay nosoratan’i Jaona. Anio isika dia namaky tao amin’ny filazantsaran’i Jaona izay nilazan’i Jesosy fa “Izy sy ny rainy dia iray ihany” Jao 10.30. Ary io Jesosy izay milaza fa iray amin’ny rainy io no torin’i Paoly sy Barnabasy tany Antokia any Pisidia.
Fa nahoana moa Jesosy no milaza fa Izy sy ny Rainy dia iray ihany ?
 Ny Jaona 10
 Jesosy namonjy fety lehibe dia ny fahatsiarovana ny nanokanana ny Tempoly tany Jerosalema no tantaraina eto. Marihina moa fa in-telo no naorina ity tempoly ity ka ny
1.    nataon’i solomona tamin’ny 1004 fony tsy mbola nizara ny fanjakana ary noravan’i Nebokadnezara
2.    tamin’ny fiverenan’ny Z.I tany amin’ny fahababoana (-515)
3.    nataon’i Heroda Lehibe (-19) ary noravan’i Titosy. Fanitarana an’ilay faharoa ihany ity.
Koa ny fahatsiarovana eto dia ny fanokanana izay nataon’i Jodasy Makabeo tamin’ny taona -164 rehefa avy nolotoin’i Antiokosy IV ny tempoly.
Teo no napetrak’ireto jiosy ireny ny fanontaniana hoe : ambaram-pahoviana no hampisalasalanao anay ? Raha hianao no Kristy lazao marina aminay.(24). Dia hoy Jesosy : efa nilaza taminareo ihany aho, nefa tsy nino ianareo. Ny asa izay ataoko no manambara ahy. Ianareo tsy mino satria tsy mba isan’ny ondriko : izay mihaino ny feoko ka manaraka ahy..Ny ondrin’i Jesosy dia fantany satria nomeny fiainana mandrakizay izy ireo ary tsy misy maharombaka azy eo an-tanan’i Jesosy. Izao teny izao dia efa nialohavan’ny hoe Izaho no mpiandry tsara, ary fantatro ny ahy sady fantany Aho (14). Misy fifankafantarana eo amin’i Jeosy sy ny ondriny. Ny tena olana tamin’ireto jiosy ireto dia ny ilazan’i Jesosy ny fifandraisany amin’izay lazainy fa Rainy. Niteraka fisarahana teo amin’izy ireo izany (19); imbetsaka no niteraka fisarahan-tsaina teo amin’i jiosy ny fampianaran’i Jesosy (7.43, 9.16)
Raha izao Jao.10 izao ihany no ho raisintsika dia ahitantsika an’i Jesosy milaza ny tenany :
·         izaho no vavahady, vavahadin’ondry  (7,9)
·         izaho no mpiandry tsara (11,14)
ary dia manohy izy ny amin’izay tokony ho toetry ny ondry ary koa ny tokony ho toetry ny mpiandry. Lazain’i Jesosy eto fa vonona Izy ny hanolotra ny ainy hamonjy ny ondry (14). Ary dia izany fifandraisan’ny ondry sy ny mpiandry azy izany no entin’i Jesosy manambara ny asa ataony eto amin’izao tontolo izao. Koa ny fanolorany ny ainy mba handraisany an’ireto ondry ireto no itiavan’ny Rainy Azy. Ary Izy sy ny Rainy dia Iray ihany ary dia izany no nakan’izy ireo vato hitorahany Azy satria miteny ny tenany ho andrimanitra Jesosy.
Izany koa no ambara amintsika amin’ity anio ity. Iza no mpiandry anao ? Mba manana mpiandry ve ianao ? Raha misy izany, iza ?
Lazain’i Jesosy fa manana ondry hafa izay tsy ao antin’ny vala ity izy (16). Ny hitory amin’izy ireny no nairahan’i Jesosy ny mpianany toa an’i Paoly sy Barnabasy izay norenesintsika tao amin’ny Asa.13.

Ondry hafa

Nirahin’i Jesosy ny Mpianany mba hitory ny filazantsara, satria efa nandray maimaim-poana ianareo hoy Izy dia manomeza maimaimpoana. Nandao an’i Jerosalema izy roalahy mba hankany amin’ity hoe Antokia any Pisidia. Rehefa tonga tany izy roalahy dia niditra tany amin’ny synagoga satria sabata ny andro. Toy ny ho mandeha any am-piangonana satria alahady. Ny synagoga moa dia toerana iangonan’ireo jiosy izay any am-pielezana (diaspora). Ary rehefa nomena fitenenana i Paoly dia nilaza mazava fa izahay mitory ny filazantsara aminareo dia ilay teny fikasana nolazaina tamin’ny razana (32) dia ny momba an’i Jesosy Kristy izany araky ny filazan’ny soratra masina azy. Lazain’izy ireto fa aoka ho fantatrareo ry rahalahy fa izany lahilahy izany no itoriana ny famelan-keloka ary koa anamarinana izay tsy azo nohamarinina tamin’ny lalàn’i Mosesy.
Izany teny nolazain’i Paoly sy Barnabasy izany dia norenesin’ireto :
Jiosyampielezana,
· izay lazain’i Lioka hoe proselyta (43) (tsy jiosy kanefa nandray ny fivavahana jiosy ka niroso hatramin’ny famorana azy ireto)
· izay lazaina hoe “matahotra an’Andriamanitra” (tsy jiosy izy ireto kanefa kosa resy lahatra ny amin’ny fivavahana jiosy).
Tamin’ny sabata voalohany dia tsara tokoa ny nandraisan’ireto jiosy an’izy roalahy. Fa tamin’ny faharoa dia tonga ary hita fa nisy ny fizarana teo amin’ireo olona tao amin’ny synagoga. Nohamafisin’i Paoly sy Barnabasy tamin’ny fahasahiana fa ianareo aloha no tsy maintsy itoriana ny Tenin’andrimanitra aloha (46) fa rehefa manda ianareo dia hitodika amin’ny jentilisa izahay.arak’izay nohafaran’i Jesosy tamin’nireo mpianany dia ny apostoly izany ao amin’ny Matio 10 dia ny fitoriana any amin’ireto ondry verin’ny Zanak’Isiraely aloha. Fa rehetfa tsy mandray ireo dia ahintsano ny vovoka eo amin’ny kapanareo mba ho mariky ny fandalovanareo ary ny fandavany ny filazantsara izay entinareo.
Notanerahin’izy roalahy izany ka dia nitodika nakany amin’ny jentilisa izy roalahy. Faly ny jentilisa ka nankalaza ny tenin’Andriamanitra nohon’ny finoany an’i Jesosy Kristy.Tsy nijanona teo amin’ny jiosy ihany ny fampielezana ny tenin’Andriamanitra fa ho an’ny olona rehetra.
 Hitantsika eto koa fa tahaka an’i Jesosy izay nakan’ireto jiosy  dia nampitaitra ny vehivavy manan-kaja sy ny lehibe teo an-tanàna mba hahavoaroaka azy roalahy ka hiala amin’ny taniny.
Sarotra ny mitory ny filazantsara satria mirteraka fanenjehana izany . hitantsika teo ny momba anb’i Jesosy. Eto isika mahita ny mpianany dia i Barnabasy sy Paoly. Kanefa kosa miteraka fiafaliana eo amin’izay mitory izany ary koa izay mandray izany. Ary izany no antony itoriantsika ny fampielezana ny filazantsara. Misy ondry hafa izay tsya to amin’ity vala ity ny Tompo. Olona tsy ato amp-iangonana FPMA Dijon, olona tsy eto Dijon, mety tsy malagasy na olon-kafa tanteraka. Mitory izany tenin’andrimanitra izany isika ary dia aminareo aloha notsy maintsy anombohana izany. Fa raha ny tenantsika aza tsy resy lahatra, ataontsika ahoana no fomba handresena lahatra ny hafa. Ny asan-tsika no tokony hanambara ny momba antsika araky nyt tenin’i Jesosy. Koa mahereza, mahatanjaha ary manaova toa an’i Davida hoe  : Jehovah no mpiandry ahy, tsy hanajava-mahory aho.... Eny tokoa, fahasoavana sy famindrampo no hanaraka ahy amin’ny andro rehetra hiainako, dia hitoetra ao an-tranon’i Jehovah andro lava aho. Amen

D.ANDRIANARIVO, FPMA Dijon
25 aprily 2010