FANAMBARANA AVY AMIN’NY FFKM – France

Hoy ny Soratra Masina : Ny olona mora tezitra manetsika ady ; izay mora misafoaka mampiavosa hadisoana (DIEM,Ohabolana 29.22)
Aoka ny isam-batan'olona samy ho dodona hihaino fa tsy ho maimaika hiteny na halaky tezitra, satria ny olona tezitra tsy mahefa izay marina soritan'Andriamanitra (DIEM, Jakoba 1.19-20) Ny FFKM-France, ivondronan’ny Fiangonana Protestanta Malagasy Aty Andafy (FPMA), ny Fitaizam-panahy eo anivon’ny Fiangonana Katolika Malagasy aty Frantsa, ny Fiangonana Anglikana Malagasy aty Frantsa, rehefa nahare sy nahita tamin’ny fampitam-baovao ny herisetra nampiharina tamin’ny Filohan’ny FJKM dia tsy afa-mangina fa maneho ny alahelony noho izany tsy rariny sy tsy mifanaraka mihitsy amin’ny fahendrena sy kolontsaina malagasy manaja raiamandreny izay natao izany.

Miombona amin’ny vahoaka kristiana ao anatin’ny FJKM manohitra izany herisetra izany, ary mampahery ny Mpitandrina Lala Rasendrahasina Filohan’ny FJKM sy Filoha Mpanampy ao amin’ny FFKM, ary mangataka ny manampahefana any Madagasikara mba hanao fanadihadiana momba izay zava-nitranga.

Ny FFKM-France dia manameloka izay mety ho herisetra rehetra, na amin’iza na amin’iza, ary mamporisika ny tsirairay, ny tompon’andraikitra ara-panjakana, ny mpitandro ny filaminana sy ny miaramila, ary ny vahoaka malagasy rehetra hampitony fo, ary handray andraikitra hampanjakana ny zon’olombelona, ny rariny, ary ny fihavanana.

Fa ny fahendrena izay avy any ambony dia voalohany indrindra madio, ary koa tia fihavanana, mandefitra, mora ifampiraharahana, be famindrampo sady mahavokatra asa soa, tsy miangatra, na mihatsaravelatsihy (DIEM, Jakoba 3.17)

Natao teto Paris, Frantsa, androany 20 marsa 2009

Ireo Filoham-piangonana ato amin’ny FFKM- France

Rev. Dr Jean A. RAVALITERA

Filohan’ny FPMA- Filohan’ny FFKM-France

Rev. Père Alphonse ZAFIMAHAKOKO

Aumônier National Catholique- Filoha Mpanampy

Atoa Nicolas RAZAFINDRATSIMA
Katekista ao amin’ny fiangonana anglikana

Tonian’ny FFKM- France