Seyssinet, faha 13 novambra 2008,

"Izay maharesy no hataoko andry eo amin'ny tempolin'Andriamanitro, ary tsy hiala eo intsony izy"

 Apok 3 : 12 a

Ry Reny sy Rahavavy malala rehetra eto anivon’ny FPMA,

Hampitomboina mandrakariva ho anareo anie ny fahasoavana sy ny fiadanana avy amin’Andriamanitra Ray sy Jesoa Kristy, Tompontsika.

Misaotra an’Andriamanitra lehibe isika fa tanteraka soa aman-tsara ny Fihaonambe faharoa nataon’ny sampana nasionaly vehivavy kristiana eto anivon’ny FPMA izay natao tany La Roque d’Anthéron tamin’ny asabotsy faha 08 sy ny alahady faha 09 novambra 2008. Ny teny faneva voasoratra eo ambony no nentina nankalazàna izany nandritran’ny roa andro, niaraka tamin’ny Hira faneva ao amin’ny Fihiràna Fanampiny 38.

Na ny Teny faneva, na ny Hira faneva, dia manambara ny maha-andry ny sampana vehivavy kristiana eo amin’ny fiangonana FPMA, sampana mijoro ary mivonona handresy, mba ho tena olon-dehibe tokoa mahatratra ny halehiben’i Kristy, ary ho vehivavy heniky ny hafenoana homen’ny Tompo.

Misaotra anareo rehetra tsy ankanavaka tonga marobe nanotrona ary nanatrika izany fihaonambe izany. Misaotra manokana an’ireo solontena enina avy any amin’ny Tafo FPMA La Réunion, anisan’izany ny Raiamandreny Mpitandrina mivady Josoa RAKOTONIRAINY. Misaotra manokana ny vahoakan’ny Tafo FPMA Aix-Marseille izay nandray, anisan’izany ny Raiamandreny Mpitandrina Jeannot RANDRIANANDRASANA.

Vita soa aman-tsara ny fanavaozana ny birao SVK nasionaly, koa mahafaly ny manolotra anareo azy ireo :

* Filoha : Olga RAKOTOJOELINA ( Tafo FPMA Aix-Marseille – Faritany Atsimo Atsinanana )

* Filoha-Mpanampy : Nivo RAJAOFERA ( Tafo FPMA Cergy – Faritany Afovoany Atsinanana )

* Mpitan-tsoratra : Annie RASOAHAINGO ( Tafo FPMA Rouen – Faritany Avaratra Andrefana )

* Mpitambola : Hanitiriniala RAJAONARY ( Tafo FPMA Paris – Faritany Afovoany Andrefana )

* Mpitan-tsoratra vola : Lala RAKOTOVAZAHA ( Tafo FPMA Dijon – Faritany Avaratra Atsinanana )

* Mpanolon-tsaina : Rachel RANDRIANJATOVO ( Tafo FPMA Toulouse – Faritany Atsimo Andrefana )

Miarahaba azy ireo isika, ary dia mitsodrano azy enina mirahavavy mba hahefa be eo amin’ny asa fanompoana itaizana sy hampiorenana azy, koa “dia MITSANGANA, SAHIA , MIJOROA, MITORIA , AZA KIVY, SANATRIA, FA AMINAO KRISTY »

«Ary ho an’Izay mahay manao mihoatra noho ny zavatra rehetra, eny mihoatra lavitra no izay rehetra angatahintsika na heverintsika aza, araka ny hery izay miasa ato amintsika, ho Azy anie ny voninahitra ao amin’ny fiangonana sy ao amin’i Kristy Jesosy hatramin’ny taranaka farany indrindra mandrakizay mandrakizay. Amen. » Efesiana 3 :20-21.

Dia manao veloma finaritra anareo .

Amin’ny anaran’ny vehivavy kristiana rehetra eto amin’ny FPMA

Nirina RAKOTOARISOA – Filoha SVK Grenoble

http://svkfpma.free.fr - Cet e-mail est protégé contre les robots collecteurs de mails, votre navigateur doit accepter le Javascript pour le voir