fpma-dijon.org - Toriteny

FPMA Dijon

Toriteny

Izaho no nieraka anao ..

pasitera

...zanako hianao, izaho no niteraka anao androany Heb 1.5

Ry havana malala,

Hatramin’ny taonjato faha 4 izay nanombohan’ny fiangonana kristiana niala tamin’izay atao hoe fiangonana an-trano no nanombohan’ny fankalazana ny atao hoe fhaterahan’i Jesosy Tompo. Tsy dia misy fototra ara-soratra masina izy ity. Izany no tsy ahitantsika, ao amin’ny epistily, ny TV rehetra momba an’ity hoe fankalazana ny nahaterahan’i Kristy ity. Tsy toy ny Paska izay mifanindry rahateo koa moa amin’ ny Paska Jiosy. Ny Paska izay ivon’ny fiainam-piangonana kristiana.

Ny tantara dia mampiseho

Amin’ity taona ity dia ny tantaran’ny fahaterahan’i Jesosy araky ny bokin’i Lioka no noraisina. Tsy mitovy amin’izay lazain’i Matio izay mitantara ny amin’ireto Magy avy tany an-tsinanana. Olona tsy jiosy fa olon-kendry sady manan-pahaizana manokana momba ny fijerena ny lanitra. Nahita ny kitan’ilay mpanjakan’ny Jiosy izy ireo ka tany amin’i Heroda izay mpanjaka no namantanany.

Resaky ny samy tsy jiosy izao tantarain’i Matio izao. Voakasikin’ny Fahaterahan’i Jesosy koa ny tsy jiosy toy ireto Magy, izay olon’ny fahalalana sy ny fahendrena ary Heroda, olon’ny fanapahana sy ny fanjakana. Jesosy mpanjaka no hitan’izy ireo

Eto amin’ity bokin’i Lioka ity indray dia voatondro mazava ny vanim-ptotoana izay nisahoan’ny tantara dia :

* Aogosto Kaisara, namoaka didy ny amin’ny fanoratana

* Kyrenio mpanapaka tany syria

Io didy navoak’i Aogosto Kaisara io no antony nialan’i Josefa sy Maria izay tany Nazareta any Galilia hankany Betlehema any Jodia mba hosoratana izy roa mpifamofo.

Tantaraina eto ny ny nahatongavany tao amin’ny tanin’i Davida, satria taranany i Josefa dia lazaina fa tsy nahita toerana hivantanana izy roa hany ka tany ampihinanam-bilona no nahaterahan’ity Lahimatoan’i Maria. Tsy dia mazava loatra ny amin’ity hoe fihinanambilona ity fa dia samy manana ny fomba fijeriny ny mpandinika maro (grotte, sns..). Ny ao antsiana dia any amin’ny fihinana’ny biby vilona Jesosy no teraka. Biby toy ny ondry izany.

Tamin’izany koa no nisehon’ireto anjely (irak’Andrimanitra) tamin’ireto mpiandry ireto mba hilaza amin’izy ireo ny amin’ny fahaterahan’ny Mpamonjy, dia Kristy Tompo. Fanambarana narahan’ny Fiderana an’Andriamanitra nataon’ireto anjely ireto

Ary dia nandeha faingana no lasa tany Betlehema izy ireto hijery an’izany zavatra izany. Ary rehefa nahita izy ireo dia nampiely izay teny nolazaina taminy ny amin’izany Zaza izany. Nankalaza sy nidera an’Andriamnitra izy ireto nohon’ny zavatra izay reny sy hitany. Izay raha fintinina fohy ny amin’ity tantara izay nosoratan’i Lioka ity momba ny nahaterahan’i Jesosy.

Inona no tsikaritra ?

* Marihina fa tsy mba misy anaran’i Jesosy voatonona eto na dia indray andeha monja aza. Any 1.31 no nolain’ny Anjely taminy fa ny anaran’ilay zazalahy dia hatao hoe Jesosy :zanakin’ny avo indrindra. Anarana hafa no iantsoana azy eto : Lahimatoa (6), zaza (6), Mpamonjy (11), Kristy Tompo (11), zazakely (12), Zavatra vao tonga izany (15). Asa na marikin’ny fanajana na fahatahorana no tsy anononana ny anaran’i Jesosy. Ny azo tenenina koa dia eo anivon’ny Jiosy ny tantara no resahina hany ka tsy dia fanaony loatra ny manonona ny anaran’Andriamanitra.

* Ny fiderana sy ny fankalazana an’Andriamanitra ny amin’izao fahaterahana izao. Fiderana nataon’ny anjely ho an’Andriamanitra : Voninahitra any amin’ny avo indrindra ho an’Andriamanitra! Ary fiadanana ho ety ambonin’ny tany amin’ny olona ankasitrahany (14). Hira izay lazain’ny mpandinika maro fa nadika tamin’ny teny hebreo. Hita koa izao hira izao any amin’ny Lio 19.38 raha niakatra ho any Jerosalema Jesosy . Ny Voninahitra dia ho an’andriamnitra fa ny fiadanana ho ety zambonin’ny tany. Io Fiadanana io no ho entin’i Jesosy ho an’ny olona. Io no vokatrin’ny famonjena izay entiny.

* Ny manodidina izao tantara izao. Lazaina fa raha teraka ny Tompo dia ny lamban-jaza no nanodidina azy. Tena olombelona no teraka eto satria fantatsika rehetra no fomba amam-panao moba izany fahaterahana nizany. Ny voninahitry ny Tompo no lazaina fa manodidina izao tantara izao tamin’ny alalan’ny anjely izay niseho tamin’ireto mpiandry ondry ireto. Tsy zaza toy ny zaza rehetra no teraka fa zanak’Andriamanitra arak’izay volazan’ny mpanoratry ny hebreo izay novakiantsika teo. Izany no manamafy ny antony tsy nanonon’izy ireo ny anaran’i Jesosy angamba.

Ny hafatry ny noely.

Amin’izao fahaterahana izao dia miara-paly ny any an-danitra sy ety an-tany. Hitantsika izany tamin’ny hiran’ireto anjely ireto. Voninahitra ho an’Andriamanitra ary fiadanana ho ety ambonin’ny tany ho an’ny olona ankasitrahany. Fa iza ary moa no ankasitrahan’Andriamanitra : ny olona rehetra satria tian’andriamanitra isika rehetra. Anjaranao no mifidy ary .Toy ireto mpiandry ireto dia aza matahotra ny mandray fanampahan-kevitra ka handeha hijery izany zavatra izany. Eny mety ho “zavatra” ihany tokoa ho anao izany amin’ny voalohany fa rehefa avy eo, rehefa avy nahita dia mampiely izay hitanao. Andramo fa tsara Jehovah.

Ny Mpiandry ondry no nolazaina eto ho enti-milaza, ohatra fa ilay teraka anie dia tsy hafa fa mitovy asa amin’izy ireo ihany: fa sady Ondry no Mpiandry tsara. Mpiandry ondry taranaka mpiandry ondry malaza dia Davida izany. Ilay ondry novonoina nohon’ny heloko, nohon’ny helokao izany no maha filazam-baovao azy : raha ianao, izaho no tokony ho faty dia voa avotra izaho sy ianao nohon’ny sorona ataon’i Jesosy teo ambony hazo fijaliana. Mpiandry tsara izy satria arak’izany, izy mpiandry no mamy ny ainy hamonjy ny ondriny. Jereo ary diniho akaiky ny nataon’ireto mpiandry ondry ireto : nankalaza an’Andriamanitra nohon’ny zavatra izay hitany sy reny arak’izay nolazaina taminy. Izany koa no andrasana amintsika rehetra izay efa nahita sy nahare ary nandray izany famonjena izany. Ny hampiely izany: fijoroana vavolombelona.

Farany, misarika ny saina ny momba an’ireto raiamandrenin’ilay zaza. I Josefa dia toa olona manatrika ihany. I Maria indray rehefa avy nanodidina lamba an’ilay zaza dia toa an’i Josefa ihany. Marika milaza izany fa na i Maria na Josefa dia samy nampiasain’Andriamanitra ihany fa tsy i zy mivady akory no nisahirana nahatanterahan’izao famonjena izao. Kanefa marika izay tsy azo ihodirana : olona manodidina an’ilay zazakely voahodidina lamban-jaza ary miverina in-telo izany eto amin’ny tantara : (7) tamin’ny fahaterahany, (12) izao no famantarana ho anareo hoy ny anjely tamin’ireto mpiandry ondry ireto, (16) nahita tokoa an’ilay Mpamonjy arak’izay nolazain’ny anjely.

Mitarika ny saintsika ny fiafaran’izao tantara izao: Fa Maria, kosa, nitadidy izany teny izany ka nieritreritr’izany tao am-pony . Ireto Mpiandry ondry ireto kosa raha nahita dia nampiely ny vaovao ka nahagaga an’izay rehetra nandre izany ary nidera sy nankalaza an’Andriamanitra,.

Voninahitra anie ho an’Andriamanitra Ray sy Zanaka ary Fanahy Masina, izay hatramin’ny taloha indrindra ka ho mandrakizay. Amen

FPMA Dijon
Noely 2009

Zanako ianao .

pasitera

Inona no hataonay ?

Administrator
..inona no hataonay ? Lio 3.10, 12, 14 Ry havana malala, Alahady fahatelo amin’ny advento anio, izany ho alahady fahatelo koa amin’ny tamp-piangonana vaovao . Advento, fiomanana amin’ny fandraisana ny mpanjaka hamangy antsika. Fomba fanao teo amin’ny fitondrana izany : rehefa ho avy ny mpitondra fanjakana dia miomana ny tanana amin’ny lafiny rehetra. Misy ny fiangonana sasany izay mampiseho ny fiomanana amin’ny adveto izany amin’ny alalan’ny fampirehetana labozia .
Tohiny...

...nofo rehetra hahita..

Administrator
...ary ny nofo rehetra hahita ny famonjen’Andriamanitra Lio 3.6 Ry havana malala, Alahady faharoa amin’ny advento anio, izany ho alahady faharoa koa amin’ny tamp-piangonana vaovao . Advento, fiomanana amin’ny fandraisana ny mpanjaka hamangy antsika. Fomba fanao teo amin’ny fitondrana izany : rehefa ho avy ny mpitondra fanjakana dia miomana ny tanana amin’ny lafiny rehetra. Misy ny fiangonana sasany izay mampiseho ny fiomanana amin’ny adveto izany amin’ny alalan’ny fampirehetana labozia :
Tohiny...

Ilay mpitondratena

pasitera

...fa izy (mpitondratena malahelo) kosa, tamin’ny alahelony no nandatsahany tao izay rehetra nananany, dia ny fivelomany rehetra Mk.12: 44 b

Ry fiangonana malala ! Ho aminareo anie ny fahasoavana sy ny fiadanana avy amin’Andriamanitra Raintsika sy Jesosy Kristy Tompontsika.

Ry havana malala,

Madiva hifarana ny taom-piangonana, afaka roa tokom-bolana eo ho eo (21 andro) izany. Madiva hifarana koa ny tantara mampiseho ny asa nataon’i Jesosy tety ambonin’ny tany satria efa any Jerosalema Izy amin’izao araky ny teny izay novakiantsika tamin’ny Mk.12 teo. Any amin’ny Tempoly, tandrifin’ny fandatsahan-drakitra Jesosy no mipetraka.

Anio isika dia hijery indray ny tantara anakiroa : Mpanora-dalàna sy ilay mpitondratena.

Ny Tantara roa

Any Jerosalema no miseho ny tantara. Jerosalema izay :

* iakaran’ny jiosy rehetra mba hamonjy fety lehibe toy ny Paska

* ifanenan’ireo olona samihafa : toy ny mpanora-dalàna ,ireo mpanao raharaha mari isan-karazany ary koa ireo olontsotrea tonga mamonjy izany fety izany.

Eto amin’izao toko sy andininy izao isika dia mahita an’i Jesosy miresaka ny momba an’reo antokon’olona ireo

Ny and.38-40 dia iresahany momba ny Mpanora-dalàna.

Mpanora-dalàna izay tsy hita sehatra intsony hatramin’ny and.12. Mpanora-dalàna izay nolazain’i Jesosy fa hamono Azy ahazoany mandray ny lova (7). Izany no antony nitadiavany hisambotra an’i Jesosy (12) kanefa natahotra ny olona izy ireo. Ireo Mpanora-dalàna ireo no lazain’i Jesosy fa tokony ho tandremana nohon’ny fitadiavan’izy ireo mba ho fantatry ny olona ka mahatonga azy mandehandeha eny :

* an-tsena : manao akanjo lava, te-hoharabain’ny olona eny an-tsena

* synagoga : mipetraka eo aloha mba ho hitan’ny olona

* fanasana : mipetraka eo aloha

Ireo marika ivelany akanjo, toerana aloha sns.. no tena mampiavaka an’ireto mpanora-dalàna ireto fa tsy ny tena asany dia ny fampianarana,fandikana ny baiboly, nilaza ny antony tokony hitazndremana ny Didy folo sns..

Fa ankoatr’izany dia mbola mandany ny volan’ny mpitondra tena izy ireo ary koa manao vavaka lavareny mba ahafantarana azy.

Lazain’i Jesosy fa hahazo fanamelohana mafimafy izy ireo.

Ny and.41-44 : mpitondra tena mahantra

Mbola any Jerosalema ihany no mitohy ny tantara, Jesosy mipetraka tandrifin’ny fandatsahan-dakitra no tantarain’i Marka eto. Maro ireo mpandatsa-drakitra hita eto tao ny manan-karena fa tao koa ny mahantra ary anisan’izany ny mpitondra-tena (veuve). Samy nandatsaka izay nananany avy. Tao ny tamin’ny harena nananany, tao ny tamin’ny fahantrany..

Tantara roa izay ny voalohany mampitandrina antsika ny amin’izay tokony hahamalina antsika dia ny fisehoana ivelany ary koa ny fanararaotana ny malemy. Ny faharoa kosa dia ny fanomezana izay tokony hataontsika dia izay ananantsika ka lafo vidy amintsika dia ny fivelomantsika rehetra

Ahoana hoy Jesosy

Niantso ny mpianany Jesosy (43) ary dia niteny hoe : “lazaiko aminareo marina dia marina tokoa” na Amen. Marika ilazana izany ny maha zava-dehibe ny vetin-kevitra na ny votoatin’ny fampianarana ho lazain’i Jesosy amin’ny Mpianany :

* Tsy misy fiderana an’ilay mpitondratena ataon’i Jesosy eto. Ny fantatra dia izao : nanome betsaka noho ireto izay lazaina fa mpanan-karena izy. Ireto mpanan-karena ireto tokoa mantsy dia izay nananany no nentiny fa tsy mba toy ity mpitondratena ity : izay rehetra nananany, ny fivelomany rehetra

* Amin’ny teny malagasy dia samy mandatsa-drakitra no ilazana izao fihetsika izao na ao amin’ny Lio 21.1 na Mk.12. Ny teny fototra kosa dia milaza fa izao fihetsika tantarain’i Marka dia tsy mba nampiasa ny teny hoe fanomezana (offrande) na fanatitra tsy alatsa-drà toy ny vokatra, fahafolokarena, fanatitra ... Ny nataon’ity mpitondra tena ity dia ny nanolotra ny fiainany rehetra teo zamin’ity fandatsahandrakitra ity.

Hafatra ho antsika

Raha nihaino isika tamin’ity anio ity dia nahare koa tany amin’ny famakiana ny testamenta taloha tantara izay mitovy amin’izao : Elia, mpaminany tany am-pandosirana, novelomin’ny goaika kanefa koa nihaona tamin’ity vehivavy mpitondra tena avy any Zarefata ity. Nanome izay nanany rehetra ho an’i Elia izy ary dia voalaza fa tsy tapitra akory ny koba ao amin’ny barika mandrampahatongan’ny ranonorana alatsak’i Jehovah amin’ny tany (I Mp.17.14). Natoky an’ilay Andriamanitr’i Elia ilay mpitondra tena ka nandray tambiny vokatr’izany.

Izao tantara izao dia miantso antsika fa tsy ny fihetsika ivelany toy ny nataon’ireto Mpanora-dalàna ireto akory no zava-dehibe. Fa ny fanomezana ny fiainanao feno ho an’Ilay Jesosy Kristy Tompontsika . Izay nanome ohatra : ny ainy no natolony hamonjy ny mahantra dia isika izany. Efa nanome antsika ohatra Izy Anjarantsika ny manaraka ny lalana izay nosoritany..

Voninahitra anie ho an’Andriamanitra Ray sy Zanaka ary Fanahy Masina, izay hatramin’ny taloha indrindra ka ho mandrakizay.

Amen

FPMA Dijon
Anio 8 novambra 2009

Suite...

<< Début < Précédente 1 2 3 4 5 6 7 8 9 10 Suivante > Fin >>

Résultats 19 - 27 sur 103

[ Retour ]

A free template from Joomlashack

FPMA Dijon

Sampana

Samihafa

Fpma Foibe

Radio Fpma